انسان مجله په ۲۰۱۳ کې له کابل څخه د فلسفې، فرهنګ او انساني علومو د حوزې د یوې څانګپوهنیزې رسنۍ په حیث شروع شوه. موخه دا وه چې د یوې درې میاشتنۍ مجلې په حیث د ژوند، فکر او چاپېریال په مهمو او انساني مسایلو بحث او تحقیق ته لاره پرانیزي. موږ غوښتل چې هیومانیزم، بشري حقونه او د عدالت مفکوره د نوي افغانستان لپاره د تازه هڅو، مفکورې او برنامې د بستر په ډول مطرح وي.

د مجلې د پنځه کلن فعالیت تر بشپړېدو وروسته پرېکړه دا وه چې د تېرې تجربې بیاکتنه وشي او د نویو تجربو د کولو پروګرام تدوین شي. له همدې مخې موږ د خپل کار د شپږم کال په دویمه نیمايي کې د خبر څانګې د پیل هوډ وکړ.

د نیوز ډېسک لپاره زموږ ترسره شوي کارونه لا هم لومړني دي. باور مو دا دی چې د یوې اوږدې دورې لپاره د خبر یوه تخصصي او مسلکي تجربه کوو چې باید د «انسان» له ټولیزې مفکورې سره اړخ ولګوي. دا نیوز ډېسک ولې او د څه لپاره رامنځته کېږي؟

افغانستان د نشراتو او مالوماتو له یو پراخ هجوم سره مخ دی. دلته د مالوماتو پراخ کثرت او نفوذ د دې باعث ګرځي چې پرېکړې تر پوښتنې لاندې راشي. یو باور خو دا دی چې خبري رسنۍ د ورځنیو چارو په اړه د ټولنې ډېرو بنسټونو، اشخاصو او فعالینو ته د فکر کولو او تغذیې په موخه لازم ادبیات تولیدوي. دا لازم ادبیات باید د ټولنې ټوله دستګاه او هره برخه کې د تحرک، ثبات، همپالنې او تحول په موخه انرژي خلق کړي او روڼ‌اندي حلقات وهڅوي چې مشترک پلاټ‌فارمونه رامنځته کړي.

په پرېلیکه خبري رسنیو کې دا ستونزه خورا جوته وه چې لوستونکي نه پوهېدل د دې مالوماتو د خپرېدا تر شا څوک دي. موږ غواړو دا ستونزه هواره شي او د یو مشخص، مالوم، او دقیق آدرس له مخې د مالوماتو، تحلیل، او تفاهم یوه متفاوته دریڅه پرانیزو. زموږ هڅه دا ده چې په خبري برخه کې روڼ‌اندي عناصر او افراد شامل کړو او داسې یوه تجربه وکړو چې نوی منځته راغلی نسلي بدلون په سالم ډول مدیریت شي.

د «خلک – پالیسي – سیاست» دا درې ګونی محور د نیوز ډېسک عمومي نشراتي چتر جوړوي. د خلکو د ژوند، فرهنګ، کړو وړو، علایقو، بوختیاوو، معرفت، پوهاوي او د مبارزې برخه یوه مهمه خبري ساحه ده. افغانستان چې یو د پراختیا په حال کې هېواد او دولت دی، د حکومتدارۍ، د نویو او موډرنو مفاهیمو او مسایلو، د ژوند ژواک او خدماتو، تحصیلي، تجارتي، ښوونیز، او فرهنګي صنعت او پرمختګ په باب پالیسي جوړونکی څرنګوالی به د یاد نیوز ډېسک دویمه مهمه ساحه وي.

سیاسي خبرونه یوازې د «ډیپلوماسي، دفاع، او پراختیا» په محور کې د سیاست د ساحې یوه حوزه ده چې د «انسان» نیوز ډېسک درېیمه ساحه ترسیموي. خبر، تحلیل، راپور، او کالم به د یادې خبر څانګې مهمې نشراتي برخې وي. اونیزې خبرې مجموعې، اختصاصي تحلیلي پکیجونه او ورځني راپورونه او خبري پوښښ به د متن، ویډیو، انځور او ګرافیک په مرسته کوو.

افغانستان په تاریخي لحاظ د سیاست، کلتور، ژوند او له پخوانیو بنسټونو سره د تعامل په یو ډېر حساس پړاو کې دی. د ټولنې، سیاست او فرهنګ له ډېرو بنسټونو څخه تر دې دمه رامنځته شوي انتباءاتو د دې ټولنې د ودې او پراختیا مخه نیولې ده. دا انتباءات د نسلونو ترمنځ د ټکر، شخړې، او د بې‌باورۍ باعث ګرځېدلي دي. موږ غواړو د یادو ستونزو په تفهیم کې مرستندوی اوسو.

قومي او مذهبي اقلیتونه، فرهنګ، معرفت، ماشومان او ښځې، چاپېریال، ساینس، بشري حقونه او د بیان آزادي ملاتړ به د یادې خبري څانګې مهم کاري او نشراتي ارزښتونه وي. موږ په دې باور لرو چې یاد ټول مسایل د افغانستان د تاریخي حافظې په هېرولو نه میسریږي، نو اړینه بولو چې تاریخ او تاریخي معرفت به د ځانګړې توجو وړ وي.

موږ به هڅه وکړو چې د خبري رسنیو تر منځ د غوره، مناسبو او پر وخت همکاریو یوه نوې تجربه وکړو. زموږ لویه هڅه به دا وي چې مرستندوی اوسو، د خپلو همکارانو، هملارو، او همفکرو ملګرو او خبري بنسټونو سره به د مشترکو ژورنالیستیکي فعالیتونو تجربه وکړو. افغانستان ترلاسه کړې د رسنیو دا تجربه باید وستایل شي او ملاتړ یې وشي.

د انسان رسنیزه اداره او په ځانګړي ډول خبر څانګه به د خبرونو د تولید تر څنګ د ډېرو ژورنالیستانو، او خبري ادارو لپاره د نویو انکشافاتو، دقیقو خبري پرمختګونو، او ظرفیت لوړاوي لپاره لازمه زمینه رامنځته کړي. له دې مخې اړینه بولو چې د فکر، فرهنک او معرفت لپاره زموږ دا تازه او ډېره نوې تجربه حمایه شي، او د موثرو بدلونونو لپاره پراختیا ورکړل شي. دا ټول د ګډ کار له لارې ممکن دي.